“So sê die Here, ... Kyk, Ek gaan iets nuuts doen, dit staan op die punt om te gebeur, julle kan dit al sien kom; Ek maak in die woestyn 'n pad, Ek laat in die droë wêreld riviere ontspring ... om my volk, my uitverkore volk, se dors te les. Dit is die volk wat Ek vir My geskep het, en wat my lof sal verkondig. Jes 43:16-21 asook Jes 35.

“As iemand dors het, laat hom na my toe kom en drink! Met die een wat in my glo, is dit soos die Skrif sê:”Strome van lewende water sal uit sy binneste vloei.’ Hiermee het Hy na die Gees verwys ...(Joh 7:37-39)

God is ‘n Padmaker. Hy maak ’n pad in die woestyn. Jesaja 35:8 beskryf dit as ‘n gewyde pad. Dis 'n heilige pad waarop slegs rein mense (God se kinders) loop. God is ook 'n Landskapsvernuwer. Hy gee volop water in die woestyn. Hy laat riviere in die droë wêreld ontspring en die dorre wêreld verander Hy in ’n lushof (Jes 35: 1 en 7). So is die nuutheid wat Hy bewerk in Dubai. Alles met ‘n doel – ‘n Volk (gemeente) wat sy Lof verkondig. Deur die Gees wat op die Pinksterdag uitgestort plaas God ons op 'n heilige weg en verander Hy ons lewens in ’n lushof. Hy skenk ons die oorvloedige seën van 'n lewe onder die beheer van die Heilige Gees. Hy ontwikkel ons karkater - mense sien en ervaar dat Jesus in ons leef. Hulle “proe” die negevoudige vrug van die Gees (Gal 5:22) en veral wat liefde behels. Die Gees gee aan ons krag - deur Sy gawes (1 Kor 12 -14, Rom 12, 1 Pet 4) en mense beleef liefde in aksie.

In die karakter (vrug) en in die krag (gawes) van die Gees leef ons heilige lewens vir God, mekaar en die wêreld en is ons missie om mense

           te bereik wat Jesus nie ken nie
           te bring tot belydenis van geloof en lidmaatskap
           te begelei om al hoe meer soos Jesus te word
           te bemagtig tot gawebediening
           te bemoedig om enduit te volhard
           tot eer van God drie-Enig.

Ons wil ook aan elkeen die geleentheid bied om betrokke te raak by

           Verheerliking van God - aanbidding
           Vermenigvuldiging van Sy ryk - evangelisasie
           Verstaan van en verbind aan Sy wil - dissipelskap
           Versorging deur God, van mekaar en ander - bediening
           Versoening met God en naaste - gemeenskap
           Volharding in die oorwinning van Jesus - gebedsintersessie